Beyləqan Rayon Polis Şöbəsinin təşkilatçılığı ilə 1-ci Şahsevən kəndində yerləşən 1 və 2 saylı tam orta məktəblərdə narkomaniyaya, erkən nikaha və dini radikalizmə qarşı maarifləndirmə tədbiri keçirilib. Bu tədbirin əsas məqsədi gənclər arasında bu kimi sosial problemlər haqda maarifləndirmə aparmaq, onları müasir dövrün təhlükələrindən qorumaq və zərərli vərdişlərdən uzaq durmağa təşviq etmək olub. Tədbirə şagirdlər, müəllimlər və valideynlər qatılıb.
Tədbirdə çıxış edən Beyləqan Rayon Polis Şöbəsinin rəisi, polis polkovniki Ceyhun Qurbanov, narkomaniya, erkən nikah və dini radikalizmin fəsadları barədə geniş məlumat verərək bu problemlərin cəmiyyətə vurduğu ziyanı vurğulayıb. C. Qurbanov, gənclərin sağlam və güclü şəxsiyyət kimi formalaşmaları üçün bu kimi mənfi meyllərin qarşısının alınmasının vacibliyini qeyd edib. O, Beyləqan Rayon Polis Şöbəsi tərəfindən narkotiklərin yayılmasının qarşısını almaq, erkən nikah hallarının azalması və radikal dini təmayüllərə qarşı mübarizə aparmaq üçün görülən qabaqlayıcı tədbirlər barədə məlumat verib.
Həmçinin, çıxışında təhsilin önəmi xüsusi vurğulanıb. Polis rəisi gənclərə, yüksək səviyyədə təhsil almalarının həyatlarında mühüm rol oynayacağını və gələcəkdə uğurlu bir karyera qurmaq üçün əhəmiyyətli olduğunu bildirib. O, gəncləri öz potensiallarını dəyərləndirməyə, maarifləndirmə işlərinə qoşulmağa və ölkənin firavan gələcəyi naminə mübarizə aparmağa çağırıb.
Tədbirdə həmçinin Polis Akademiyasında təhsil almaq arzusunda olan məktəblilərə də geniş məlumatlar verilib. Bu barədə məlumatlar verərkən, polkovnik Ceyhun Qurbanov Akademiyada təhsil prosesi, qəbul şərtləri və polisin cəmiyyətdəki rolu barədə şagirdləri məlumatlandırıb. Gələcəyin hüquq-mühafizə orqanı işçiləri olmaq arzusunda olan gənclər üçün bu məlumatlar çox dəyərli olub.
Tədbirin sonunda şagirdlər və iştirakçılar tərəfindən verilən suallar cavablandırılıb. Polis rəisi və digər əməkdaşlar tədbir boyunca mövzu ətrafında ortaya çıxan sualları geniş şəkildə izah edib və auditoriyanı maraqlandıran məsələlər barədə ətraflı məlumat veriblər. Daha sonra narkomaniya, erkən nikah və dini radikalizmin fəsadları ilə bağlı maarifləndirici videoçarx nümayiş etdirilib. Bu videoçarx vasitəsilə şagirdlər zərərli vərdişlərdən çəkinməyin və maarifləndirmə işlərinə qoşulmağın əhəmiyyəti barədə vizual məlumat əldə ediblər.
Bu tədbir Beyləqan Rayon Polis Şöbəsinin sosial problemlərə qarşı maarifləndirmə istiqamətində gördüyü işlərdən biri kimi məktəblilər arasında dərin iz buraxıb və onların gələcəkdə sağlam, zərərli vərdişlərdən uzaq bir cəmiyyətin formalaşması yolunda maariflənməsinə şərait yaradıb.
102info.az
