Vətən müharibəsində canından keçən qəhrəmanlarımızın əziz xatirəsi daim ehtiramla yad olunur
Azərbaycan xalqının tarixində əbədi iz qoyan 44 günlük Vətən müharibəsi ölkəmizin ərazi bütövlüyünün bərpası və torpaqlarımızın işğaldan azad edilməsi ilə nəticələnən şanlı Zəfər salnaməsidir. Bu möhtəşəm Qələbənin arxasında isə Vətən qarşısında ən böyük fədakarlığı göstərən şəhidlərimizin müqəddəs irsi dayanır.
Azərbaycan Respublikasının Daxili İşlər Nazirliyinin şəxsi heyəti Vətən müharibəsində şəhidlik zirvəsinə ucalan qəhrəman Vətən övladlarının xatirəsini ehtiramla yad etmək məqsədilə Zəfər parkını ziyarət edib.
Ziyarət zamanı Daxili İşlər Nazirliyinin əməkdaşları Vətən uğrunda canından keçən şəhidlərimizin xatirəsinə dərin ehtiramlarını ifadə edib, xatirə daşının önünə əklil və gül dəstələri qoyublar.
Zəfər parkında keçirilən ziyarət bir daha göstərdi ki, Azərbaycanın ərazi bütövlüyü və suverenliyi uğrunda həyatını fəda edən qəhrəman oğul və qızlarımızın xatirəsi dövlətimiz və xalqımız tərəfindən daim uca tutulur.
44 günlük Vətən müharibəsi Azərbaycan xalqının sarsılmaz iradəsinin, milli birliyinin və dövlətçilik əzminin təntənəsi oldu. Azərbaycan Ordusunun Müzəffər Ali Baş Komandanın rəhbərliyi ilə həyata keçirdiyi hərbi əməliyyatlar nəticəsində uzun illər işğal altında qalan torpaqlarımız azad edildi. Bu tarixi Zəfərin qazanılmasında hərbçilərimizin qəhrəmanlığı ilə yanaşı, arxa cəbhədə xidmət edən insanların fədakarlığı da mühüm rol oynadı.
Lakin bu Qələbənin ən ağır qiymətini canı ilə ödəyən şəhidlərimizin adı Azərbaycan tarixinin ən şərəfli səhifələrinə əbədi həkk olunub.
Onlar Vətən torpağının hər qarışını müqəddəs bilib ölümün gözünə dik baxdılar. Şəhidlərimizin göstərdiyi qəhrəmanlıq gələcək nəsillər üçün Vətən sevgisinin ən ali nümunəsidir.
Bu gün azad Qarabağda və Şərqi Zəngəzurda aparılan genişmiqyaslı quruculuq işləri, doğma torpaqlarına qayıdan insanların sevinc və qüruru həmin qəhrəmanlığın davamıdır. İşğaldan azad edilmiş ərazilərdə Azərbaycan Bayrağının dalğalanması şəhidlərimizin bizə miras qoyduğu ən böyük əmanətlərdən biridir.
Daxili İşlər Nazirliyinin şəxsi heyətinin Zəfər parkına ziyarəti də şəhidlərimizin müqəddəs xatirəsinə olan ehtiramın ifadəsidir. Azərbaycan polisi də Vətən müharibəsi zamanı qarşıya qoyulan vəzifələrin yerinə yetirilməsində, ictimai təhlükəsizliyin və asayişin təmin olunmasında, azad edilmiş ərazilərdə xidmətin təşkilində öz üzərinə düşən məsul vəzifələri şərəflə yerinə yetirib.
Bu gün DİN əməkdaşlarının şəhidlərimizin xatirəsi qarşısında ehtiramla dayanması həm də bir həqiqəti nümayiş etdirir: Vətən uğrunda canından keçən qəhrəmanlar heç vaxt unudulmur.
Şəhidlərimizin adı xalqımızın yaddaşında əbədi yaşayacaq. Onların qəhrəmanlığı Azərbaycan gəncliyinə Vətən sevgisi, milli qürur və dövlətçilik nümunəsi olaraq nəsildən-nəslə ötürüləcək.
Zəfər parkında dalğalanan Azərbaycan Bayrağı isə şəhidlərimizin ruhuna verilən ən böyük ehtiramın rəmzidir.
Allah bütün şəhidlərimizə rəhmət eləsin!
Qazilərimizə şəfa, şəhid ailələrinə səbir versin!
Qəhrəman Vətən övladlarının əziz xatirəsi daim uca tutulacaq!
102info.az
