Azərbaycan dövləti müstəqilliyini bərpa etdikdən sonra qarşıya çıxan ən mühüm vəzifələrdən biri hüquqi dövlət quruculuğu, qanunun aliliyinin təmin olunması və ictimai təhlükəsizliyin möhkəmləndirilməsi idi. Bu istiqamətdə Azərbaycan Polisi daim dövlətçiliyin keşiyində dayanaraq xalqın təhlükəsizliyinin qorunmasında, cinayətkarlığa qarşı mübarizədə və sabitliyin təmin edilməsində mühüm rol oynayıb.
Ulu Öndər Heydər Əliyev hüquq-mühafizə orqanlarının fəaliyyətinə daim xüsusi diqqət yetirərək bildirirdi ki, “Polis xalqın, dövlətin və qanunun keşiyində duran ən mühüm təsisatdır.” Məhz Ümummilli Liderin rəhbərliyi dövründə Daxili İşlər Nazirliyində əsaslı islahatlar həyata keçirildi, polis orqanlarının maddi-texniki bazası gücləndirildi, şəxsi heyətin peşəkarlığının artırılması istiqamətində mühüm addımlar atıldı. Bu uzaqgörən siyasət Azərbaycan polisinin müasir inkişaf yolunun möhkəm təməlini formalaşdırdı.
Bu gün Ulu Öndərin siyasi kursu Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev tərəfindən uğurla davam etdirilir. Prezident İlham Əliyevin rəhbərliyi ilə ölkəmizdə hüquq qaydalarının möhkəmləndirilməsi, vətəndaş məmnunluğunun artırılması və müasir polis sisteminin formalaşdırılması istiqamətində mühüm nailiyyətlər əldə olunub. Dövlət başçısının xüsusi diqqəti nəticəsində polis əməkdaşlarının sosial müdafiəsi gücləndirilib, yeni inzibati binalar istifadəyə verilib, ən müasir texnologiyalar hüquq-mühafizə orqanlarının fəaliyyətinə tətbiq olunub.
Azərbaycan Polisi bu gün təkcə cinayətkarlığa qarşı mübarizə aparan qurum deyil, eyni zamanda vətəndaşın təhlükəsizliyini, hüquq və azadlıqlarını qoruyan etibarlı dövlət institutudur. Polis əməkdaşları gecə-gündüz demədən xidmətdə dayanır, cəmiyyətin asayişi və insanların rahat həyatı naminə böyük fədakarlıq göstərirlər. Onların peşəkarlığı, operativliyi və qanuna sadiqliyi dövlətə və xalqa xidmət nümunəsidir.
Daxili İşlər Naziri, general-polkovnik Vilayət Eyvazovun rəhbərliyi ilə Azərbaycan Polisi öz inkişafının yeni mərhələsini yaşayır. Nazirliyin fəaliyyətində şəffaflığın artırılması, xidmət keyfiyyətinin yüksəldilməsi, müasir idarəetmə üsullarının tətbiqi və vətəndaş müraciətlərinə operativ baxılması prioritet istiqamətlərdən biridir. Cinayətkarlığa qarşı qətiyyətli mübarizə, narkotik vasitələrin qanunsuz dövriyyəsinin qarşısının alınması, kibercinayətkarlıqla mübarizə, yol hərəkəti təhlükəsizliyinin təmin olunması və ictimai asayişin qorunması sahəsində əldə olunan uğurlar bu siyasətin real nəticələridir.
Xüsusilə Vətən müharibəsindən sonra işğaldan azad edilmiş ərazilərdə təhlükəsizliyin təmin olunması, yeni polis şöbələrinin yaradılması və hüquq-mühafizə fəaliyyətinin təşkil edilməsi dövlətimizin gücünü və Azərbaycan polisinin peşəkarlığını bir daha nümayiş etdirdi. Polis əməkdaşları həmin torpaqlarda da xalqın təhlükəsiz həyat şəraitinin formalaşdırılması üçün böyük məsuliyyətlə xidmət göstərirlər.
Azərbaycan polisi daim şəhid ailələrinə, qazilərə və müharibə veteranlarına xüsusi həssaslıqla yanaşır, dövlət siyasətinin bu istiqamətdə həyata keçirilməsində fəal iştirak edir. Bu, polisin yalnız hüquq-mühafizə orqanı deyil, həm də yüksək mənəvi dəyərlərə sahib dövlət qurumu olduğunu göstərir.
Müasir dövrdə informasiya texnologiyalarının inkişafı ilə yanaşı yeni təhlükələr də meydana çıxır. Kibercinayətkarlıq, transmilli cinayətkarlıq və digər çağırışlara qarşı Azərbaycan Polisi yüksək peşəkarlıq nümayiş etdirərək beynəlxalq əməkdaşlığı genişləndirir və müasir texnologiyalardan səmərəli istifadə edir. Bu da ölkəmizin təhlükəsizliyinin daha etibarlı şəkildə qorunmasına xidmət edir.
Azərbaycan Polisi xalqın inamını qazanan, dövlətçiliyin dayaqlarından biri olan güclü bir təsisatdır. Onun hər bir əməkdaşı şərəfli forma geyinərək dövlətə sədaqət andına sadiq qalır, qanunun aliliyini qorumaq üçün həyatını belə təhlükəyə atmaqdan çəkinmir. Məhz buna görə də polis peşəsi yalnız xidmət deyil, həm də böyük məsuliyyət, vətənpərvərlik və fədakarlıq nümunəsidir.
Əminliklə demək olar ki, Ulu Öndər Heydər Əliyevin müəyyən etdiyi inkişaf strategiyası, Prezident İlham Əliyevin uğurlu dövlət siyasəti və Daxili İşlər Naziri Vilayət Eyvazovun rəhbərliyi altında Azərbaycan Polisi bundan sonra da xalqın təhlükəsizliyinin keşiyində inamla dayanacaq, dövlətçiliyimizin möhkəmlənməsinə və hüquqi cəmiyyətin inkişafına öz mühüm töhfələrini verməyə davam edəcəkdir.
Müəllif: Cəmil Babayev
102info.az xəbər portalının redaktor müavini
102info.az
