Binəqədi rayonunun 9-cu mikrorayonunda ictimai asayiş və təhlükəsizlik yüksək səviyyədə təmin olunur.
Bu yazı Binəqədi rayonunun 9-cu mikrorayonunda yaşayan bir vətəndaş kimi şəxsi müşahidələrim və gündəlik həyatımda rastlaşdığım reallıqlar əsasında qələmə alınmışdır. Paytaxt Bakının ən sıx və dinamik yaşayış məntəqələrindən biri olan 9-cu mikrorayon son illərdə təkcə infrastruktur baxımından deyil, həm də təhlükəsizlik və ictimai asayişin təmin olunması baxımından ciddi irəliləyişlərə nail olmuşdur. Bu irəliləyişlərin əsas təməlində isə Binəqədi Rayon Polis İdarəsinin nəzdində fəaliyyət göstərən 7-ci Polis Bölməsinin fədakar və peşəkar əməkdaşlarının misilsiz əməyi dayanır.
9-cu mikrorayon ərazisində son dövrlər cinayət hallarının, xüsusən də oğurluq, xuliqanlıq, ictimai qayda pozuntuları və digər hüquqazidd əməllərin nəzərəçarpacaq dərəcədə azalması müşahidə olunur. Bütün bunlar birbaşa olaraq polis əməkdaşlarının operativ fəaliyyəti, strateji nəzarət tədbirləri və qabaqlayıcı profilaktik işlərinin nəticəsidir.
Polis naryadlarının ərazidə gecə-gündüz fasiləsiz patrul xidmətləri sakinlərdə təhlükəsizlik hissini daha da gücləndirmiş, vətəndaşlarda dövlətə və hüquq-mühafizə orqanlarına olan etimadı artırmışdır. Xüsusilə axşam və gecə saatlarında müşahidə olunan polis patrullarının fəaliyyəti ərazidə hərəkət edən sakinlərin rahatlığını və əmin-amanlığını təmin edir.
Ərazidə fəaliyyət göstərən polis əməkdaşlarının vətəndaşlarla qurduğu mehriban və səmimi münasibət, onların problemlərinə çevik və diqqətli yanaşması ictimai rəydə müsbət iz buraxmışdır. Artıq vətəndaş-polis münasibətləri sadəcə inzibati münasibət deyil, qarşılıqlı anlaşma və əməkdaşlıq üzərində qurulmuş bir sistemə çevrilmişdir.
Əhalinin fikrincə, 7-ci Polis Bölməsinin əməkdaşları arasında yüksək peşəkarlıq, etik davranış qaydalarına əməl və milli-mənəvi dəyərlərə hörmət prinsipləri daim ön plandadır. Bu da ictimai asayişin təkcə hüquqi yollarla deyil, mənəvi əsaslarla da qorunduğunu sübut edir.
Bugünkü müsbət nəticələr əlbəttə ki, sistemli islahatların, düzgün idarəçilik strategiyasının və yeni yanaşmaların tətbiqi sayəsində mümkün olmuşdur. Daxili İşlər Nazirliyinin rəhbərliyi tərəfindən həyata keçirilən məqsədyönlü islahatlar çərçivəsində hüquq-mühafizə orqanlarının maddi-texniki bazası müasirləşdirilmiş, şəxsi heyətin peşə hazırlığı artırılmış və xidmətin effektivliyini təmin edən yeni texnologiyalar tətbiq olunmuşdur.
Həmçinin, müasir monitorinq sistemlərinin tətbiqi, videomüşahidə kameralarının quraşdırılması, operativ məlumat bazalarının gücləndirilməsi və çağrı mərkəzlərinin fəaliyyəti nəticəsində polis əməkdaşlarının vətəndaş müraciətlərinə daha sürətli cavab verməsi təmin olunmuşdur.
Yalnız cinayətə qarşı mübarizə deyil, eyni zamanda bu cür halların baş verməsinin qarşısının alınması istiqamətində də əhəmiyyətli tədbirlər həyata keçirilir. Məktəblərdə, gənclər arasında keçirilən maarifləndirici görüşlər, hüquqşünaslarla təşkil olunan açıq dərslər, sosial şəbəkələrdə hüquqi təbliğat materiallarının paylaşılması gənc nəslin hüquq mədəniyyətinin formalaşmasına xidmət edir.
Bu istiqamətdə 7-ci Polis Bölməsinin əməkdaşları tərəfindən həyata keçirilən profilaktik tədbirlər təkcə 9-cu mikrorayon ərazisində deyil, bütövlükdə rayonun təhlükəsizlik sisteminə müsbət təsir göstərmişdir.
Bu gün 9-cu mikrorayonda yaşayan hər bir vətəndaş əmindir ki, onların təhlükəsizliyi, hüquqları və gündəlik həyatlarının sabitliyi peşəkar və fədakar Azərbaycan polisi tərəfindən qorunur. Bu isə hüquq-mühafizə orqanlarının dövlətə və xalqa bağlılığının, xalqa xidmət missiyasını şərəflə yerinə yetirmələrinin bariz nümunəsidir.
Sonda demək olar ki, 9-cu mikrorayon ərazisində əldə olunan bu uğurlar gələcəyə ümidlə baxmağa, ictimai rifahın qorunmasına və vətəndaş-məmur münasibətlərinin sağlam əsaslar üzərində formalaşmasına şərait yaradır. Belə bir mühüm və şərəfli missiyanı həyata keçirən polis əməkdaşlarına təşəkkür düşür: Siz cəmiyyətin səssiz qəhrəmanlarısınız!
Müəllif : EYVAZ MƏMMƏDOV
102info.az
