Ombudsmanın MPM fəaliyyəti çərçivəsində sağlamlıq imkanları məhdud uşaqlar üçün xüsusi internat məktəblərinə başçəkmələr həyata keçirilib
Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyevanın Milli Preventiv Mexanizm (MPM) fəaliyyəti çərçivəsində Ombudsmanın Milli Preventiv Qrupunun (MPQ) üzvləri tərəfindən Elm və Təhsil Nazirliyinin nəzdində fəaliyyət göstərən E. Quliyev adına sağlamlıq imkanları məhdud uşaqlar üçün 9 nömrəli xüsusi internat məktəbinə və E. Mirzəyev adına sağlamlıq imkanları məhdud uşaqlar üçün 6 nömrəli Respublika xüsusi internat məktəbinə planlı başçəkmələr həyata keçirilib.
Başçəkmələrin məqsədi və istiqamətləri
Səfərin əsas məqsədi internat məktəblərində saxlanma şəraitinin, uşaqlara göstərilən rəftarın, uşaq hüquqlarının təmin olunmasının vəziyyətinin yoxlanılması, eləcə də əvvəlki başçəkmələr zamanı aşkar olunmuş nöqsanların aradan qaldırılması səviyyəsinin monitorinqi olub.
Başçəkmələr zamanı müəssisələrin yataqxana, yeməkxana, tibb məntəqəsi, sinif otaqları və digər inzibati bölmələrinə baxış keçirilib. Eyni zamanda, uşaqların asudə vaxtının təşkili, qidalanma, içməli su təminatı, sanitariya şəraiti, psixoloji işin aparılması və sənədləşmə işləri araşdırılıb.
Aşkar olunan nöqsanlar və problemlər
Monitorinq çərçivəsində hər iki müəssisədə bir sıra çatışmazlıqlar qeydə alınıb. Belə ki:
- 6 nömrəli Respublika xüsusi internat məktəbində bəzi dərman preparatlarının istifadə müddətinin bitdiyi, işıqlandırmanın normalara cavab vermədiyi müəyyən edilib.
- 9 nömrəli xüsusi internat məktəbində bəzi ərzaq məhsullarının yararlılıq müddətinin bitdiyi aşkarlanıb.
- Hər iki müəssisədə uşaqlarla aparılan psixoloji işə dair sənədlərdə məlumatların tam əks olunmadığı müşahidə edilib.
Tövsiyələr və nöqsanların aradan qaldırılması istiqamətində tədbirlər
Aşkar edilmiş problemlərlə bağlı Ombudsman Aparatının əməkdaşları tərəfindən beynəlxalq və yerli qanunvericiliyin tələbləri müəssisə rəhbərliyinin diqqətinə çatdırılıb. Saxlanma şəraitinin və sənədləşmə işlərinin təkmilləşdirilməsi istiqamətində müvafiq tövsiyələr verilib.
Eyni zamanda, müəyyən edilmiş çatışmazlıqların operativ şəkildə aradan qaldırılması məqsədilə Elm və Təhsil Nazirliyinə rəsmi müraciət ünvanlanacaq.
Qeyd edək ki, Ombudsmanın Milli Preventiv Qrupu tərəfindən müvafiq müəssisələrdə mütəmadi monitorinqlər həyata keçirilir və uşaq hüquqlarının müdafiəsi daim diqqət mərkəzində saxlanılır.
102info.az
