Bu gün Azərbaycanın ictimai-siyasi və elmi mühitində öz dərin izini qoymuş, zəngin biliyi, yüksək mənəvi keyfiyyətləri və parlaq vətənpərvərliyi ilə tanınan dəyərli şəxsiyyət, millət vəkili, professor Fəzail Feyruz oğlu İbrahimlinin doğum günüdür. O, 1951-ci il aprelin 12-də Azərbaycanın cənub sərhədində, Yardımlı rayonunun füsunkar təbiətli Çanaqbulaq kəndində dünyaya göz açıb.
İlkin təhsilini doğma kəndində alan Fəzail müəllim hələ o dövrlərdən elmə və təhsilə dərin maraq göstərmiş, geniş dünyagörüşü, məntiqi təfəkkürü və zəhmətsevərliyi ilə fərqlənmişdir. Bu keyfiyyətləri onu 1969-cu ildə Azərbaycan Pedaqoji Universitetinin Tarix fakültəsinə gətirib çıxarır. 1973-cü ildə ali təhsilini müvəffəqiyyətlə başa vurduqdan sonra o, təyinatla doğma yurduna – Yardımlının Çanaqbulaq kənd məktəbinə qayıdır və 1973–1977-ci illərdə burada müəllimlik edir. Bu illər onun yalnız pedaqoq kimi deyil, həm də ziyalı və vətənpərvər insan kimi yetişməsində mühüm mərhələ olur.
1977–1979-cu illərdə hərbi xidmətdə olan Fəzail İbrahimli, Vətənə və dövlətə bağlılığını təkcə sözlə deyil, əməldə də göstərir. Hərbi xidmətdən qayıtdıqdan sonra isə elm yolunu seçir və 1979–1982-ci illərdə Bakı Dövlət Universitetinin əyani aspiranturasında təhsilini davam etdirir. Bu addımı onun elmi fəaliyyətə ciddi və sistemli şəkildə qədəm qoyduğunu göstərir.
1982-ci ildən etibarən Bakı Dövlət Universitetində müəllimlik fəaliyyətinə başlayan Fəzail müəllim, Kommunist Partiyası Tarixi kafedrasında müəllim, baş müəllim və dosent kimi çalışmış, 1998-ci ildən isə artıq professor elmi dərəcəsi ilə Azərbaycan Tarixi kafedrasında pedaqoji fəaliyyətini davam etdirmişdir. Elmi yaradıcılığında Azərbaycan tarixinin müxtəlif dövrlərinə, milli ideologiyanın formalaşmasına və dövlətçilik ənənələrinə dair dəyərli tədqiqatlara imza atmışdır.
1986-cı ildə namizədlik, 1998-ci ildə isə doktorluq dissertasiyasını uğurla müdafiə edən Fəzail İbrahimli, bu illər ərzində yalnız elmi fəaliyyətlə kifayətlənməyib, həm də tədris sahəsində gənc nəslin yetişməsinə, onların milli-mənəvi ruhda formalaşmasına böyük əmək sərf etmişdir. O, bir monoqrafiyanın, bir kitabın, bir dərsliyin və 60-a yaxın elmi məqalənin müəllifidir ki, bu da onun Azərbaycan elminə verdiyi töhfələrin miqyasını göstərir.
Fəzail İbrahimli sadəcə elm adamı deyil. O, həm də millət vəkili, xalqın səsinə çevrilə bilən, onun dərdini tribuna səviyyəsində dilə gətirən əsl ziyalıdır. Onun Milli Məclisdəki fəaliyyəti zamanı söylədiyi çıxışlar, qaldırdığı məsələlər, irəli sürdüyü təkliflər hər zaman ölkənin milli maraqlarına, xalqın rifahına və dövlətçiliyimizin möhkəmləndirilməsinə yönəlmişdir.
Bu gün biz Fəzail İbrahimlini həm tanınmış alim, həm təcrübəli pedaqoq, həm də ləyaqətli millət vəkili kimi tanıyırıq. Onun həyat yolu bir çox gənclər üçün nümunədir – elmə sədaqətlə xidmət etmək, təhsilə vətən sevgisi ilə yanaşmaq, dövlətə və xalqa bağlı olmaq.
Bu əlamətdar gündə – 74 yaşının tamamında, biz onu səmimi qəlbdən təbrik edir, ona möhkəm cansağlığı, elmi-pedaqoji və siyasi fəaliyyətində yeni-yeni uğurlar arzulayırıq.
Çünki Fəzail İbrahimli olmaq – bir ömrü elmin, təhsilin, millətin və dövlətin xidmətinə sərf etmək deməkdir.
102info.az
