10 iyun tarixi Azərbaycan polisi tarixinə öz adını ləyaqətlə yazmış, həyatını dövlətə və xalqa xidmətə həsr etmiş bir insanın – mərhum general-mayor Rasim Musayevin doğum günüdür. Bu gün onun 1960-cı ildə Tərtər rayonunda dünyaya gəlişinin 65 ili tamam olur. O, sadəcə bir hüquq-mühafizə orqanı əməkdaşı deyil, həm də vətəninə, xalqına sədaqətlə xidmət etmiş bir vətəndaş, prinsipial və məsuliyyətli rəhbər, səmimi və müdrik bir insan kimi yaddaşlara həkk olunub.
Rasim Musayev əslən qədim Azərbaycan yurdu olan Göyçə mahalının Kiçik Məzrə kəndindəndir. Onun həyat yolu hər bir azərbaycanlı üçün nümunə sayıla bilər. O, 2001-ci ildə Daxili İşlər Nazirliyinin Polis Akademiyasını bitirərək peşəkar hüquqşünas kimi formalaşdı. Ardınca isə daxili işlər orqanlarında müxtəlif məsul vəzifələrdə fəaliyyətini davam etdirdi. Hər yerdə öz bacarığı, prinsipiallığı, qanunlara və insanlara hörməti ilə seçildi.
Onun xidmət yolu Azərbaycanın müxtəlif bölgələrindən keçdi:
Binəqədi Rayon Polis İdarəsində rəis müavini və 5-ci polis bölməsinin rəisi kimi,
DİN İctimai Təhlükəsizlik İdarəsində şöbə rəisi olaraq,
Sabunçu rayonunda 15-ci polis bölməsinin rəhbəri kimi,
Cəlilabad Rayon Polis Şöbəsinin rəisi (2005–2007),
Gəncə Şəhər Polis İdarəsinin, daha sonra isə Gəncə Şəhər Baş Polis İdarəsinin rəisi vəzifələrində (2007–2013) çalışaraq özünü ləyaqətli, prinsipial və vətəndaşlarla münasibətdə ədalətli bir rəhbər kimi tanıtdı.
Onun vətənə xidmətinə verilən ən yüksək qiymətlərdən biri də 2011-ci ildə Prezident İlham Əliyevin sərəncamı ilə polis general-mayoru ali xüsusi rütbəsinə layiq görülməsi oldu. Bu rütbə təkcə vəzifə yox, həm də Rasim Musayevin illərlə göstərdiyi fədakar xidmətlərinin, dürüstlüyünün və rəhbərlik bacarığının təcəssümü idi.
2013-cü ildə öz xahişi ilə Gəncə Şəhər Baş Polis İdarəsinin rəisi vəzifəsindən azad edilən Rasim Musayev, həmin il Daxili Təhqiqatlar İdarəsinin rəisi təyin olundu. Bu mühüm və məsuliyyətli postda da o, prinsipial mövqeyi, obyektivliyi və daxili işlər orqanlarında intizamın möhkəmləndirilməsi istiqamətində yorulmadan çalışan bir rəhbər olaraq fəaliyyət göstərdi.
Təəssüf ki, Rasim Musayevin ömür yolu qısa oldu. O, 3 sentyabr 2015-ci ildə Bakı şəhərində ürəktutmasından vəfat etdi. Onun vəfatı təkcə ailəsi və yaxınları üçün deyil, bütün hüquq-mühafizə sistemi üçün böyük bir itkidir. Mərhum general Mehdiabad qəbiristanlığında dəfn edilib. Bu gün də onu tanıyanlar, onunla birgə çalışmış həmkarları, tələbələri və vətəndaşlar onu hörmət və ehtiramla xatırlayır.
Rasim Musayevin həyat yolu və fəaliyyəti gənc nəsil hüquq-mühafizə orqanları əməkdaşları üçün nümunədir. O, işinə və andına sadiq bir insan idi. Onun adına xatirələrdə ehtiramla yanaşılır, doğum və anım günlərində rəhmətlə yad edilir.
Allah rəhmət eləsin, general!
Xalq səni unutmadı, unutmayacaq!
Tural Kəlbəcərli
102info.az
