Sos! Çağırış! Xəbərdarlıq!
Bank kartları ilə əlaqəli olan zənglərə və mesajlara əsla cavab verməyin — danışmayın, yazışmayın, dərhal bloklayın!
Fırıldaqçılar gündən-günə daha da hiyləgər üsullara əl atır. Onlar sizə bank, mobil operator, hüquq-mühafizə orqanı və ya başqa bir rəsmi qurum adından zəng edib, adətən belə deyirlər: “Bank kartınıza müdaxilə var, hesabınızda olan vəsaitin qorunması üçün sizə göndərilən kodu təsdiqləyin”. Qeyd edək ki, bu tələyə düşənlər təkcə yaşlılar deyil — fırıldaqçılar hər yaş qrupundan insanı hədəf seçirlər.
Bugünkü acı nümunə — Tərtər sakini:
Gürcüstan mobil nömrəsindən gələn zəngə inanan və qarşı tərəfin dediklərini sorğu-sualsız yerinə yetirən vətəndaş, göndərilən kodu təsdiqləməklə 15.580 manat məbləğində pulun öz hesabından oğurlanmasına şərait yaradıb. Fırıldaqçıların istədiyi tək şey sizin “göndərilən kodu” təsdiqləməyinizdir — bu kod sizin bank hesabınızın açarıdır! Siz kodu verdiyiniz anda, əslində oğrunun cibinə öz pulunuzu öz əlinizlə qoymuş olursunuz.
Diqqətli olun!
- Heç bir bank, heç bir rəsmi qurum sizdən telefonla kod, PIN, CVV və ya digər şəxsi maliyyə məlumatlarını istəməz!
- “Təcili təsdiq edin!”, “Bloklanmamaq üçün kodu yazın!”, “Əgər cavab verməsəniz, hesabınız dondurulacaq!” kimi ifadələrlə sizə təzyiq göstərməyə çalışırlar.
- Bu cür zəng və mesajları dərhal sonlandırın, cavab verməyin, nömrəni bloklayın və bu barədə hüquq-mühafizə orqanlarına məlumat verin.
Tövsiyələr:
- SMS-lə gələn kodu heç kimlə paylaşmayın — hətta özünüzə belə göndərilmiş olsa, ciddi yanaşın.
- Mobil tətbiqlərin, xüsusilə də bank proqramlarının təhlükəsizlik parametrlərini aktiv saxlayın.
- Naməlum nömrələrdən gələn çağırışlara qarşı kritik düşünün — sizi panikaya salmağa çalışanlara inanmayın.
- Bu tip hallarla qarşılaşdıqda, 112 və ya 102 qaynar xətlərinə məlumat verin.
Unutmayın: təhlükəsizlik sizdən başlayır. Hər kəs bu hallarla qarşılaşa bilər, lakin doğru davranış sizi və vəsaitlərinizi qoruyar. Məlumatlı olmaq və paylaşmaq fırıldaqçıların qarşısını almağın ən təsirli yoludur.
Lütfən, bu məlumatı paylaşın. Bu, sabah bir başqasının həyatını və əmanətini qurtara bilər!
102info.az
