Quba Rayon Polis Şöbəsinin Dövlət Yol Polisi Bölməsinin əməkdaşları hava şəraiti ilə əlaqədar gücləndirilmiş iş rejimində çalışırlar.
Son günlər ölkə ərazisində müşahidə olunan qarlı və şaxtalı hava şəraiti nəqliyyat vasitələrinin hərəkətinə təsir göstərdiyindən, Quba rayonunda da yol polisi əməkdaşları sürücülərin və piyadaların təhlükəsizliyini təmin etmək üçün səfərbər olunublar.
Dövlət Yol Polisi Bölməsinin əməkdaşları əsas magistral yollarla yanaşı, dağlıq və kənd ərazilərində də nəzarəti gücləndiriblər. Əsas məqsəd sürücülərə dəstək olmaq, onların qarlı və buzlu yollarda təhlükəsiz hərəkətini təmin etmək, yol-nəqliyyat hadisələrinin qarşısını almaqdır. Bunun üçün polis əməkdaşları nəqliyyat vasitələrinin təkərlərini və texniki vəziyyətini yoxlayır, sürücülərə zəruri tövsiyələr verir və ehtiyac olduqda onlara yardım edirlər.
Eyni zamanda, DYP əməkdaşları sürücülərə havanın kəskin dəyişməsi ilə əlaqədar sürət həddinə ciddi riayət etməyi, ehtiyatlı və məsuliyyətli davranmağı tövsiyə edirlər. Qarlı və buzlu yollarda qəzalardan yayınmaq üçün avtomobillərin qış təkərləri ilə təmin olunması, ara məsafəsinin gözlənilməsi və qəfil manevrlərdən çəkinmək xüsusilə vacibdir.
Hazırda Quba Rayon Polis Şöbəsinin Dövlət Yol Polisi Bölməsi tərəfindən nəqliyyatın təhlükəsiz hərəkətini təmin etmək üçün qabaqlayıcı tədbirlər davam etdirilir. Yol şəraitinin çətinləşməsi səbəbindən avtomobil yollarında hərəkət edən sürücülərə diqqətli olmaları, hava şəraitinə uyğun olaraq nəqliyyat vasitələrini idarə etmələri tövsiyə olunur.
Yol polisi vətəndaşları, xüsusilə də piyada hərəkət iştirakçılarını da diqqətli olmağa çağırır və onları yollarda təhlükəsizliyə ciddi riayət etməyə dəvət edir. Hazırda gücləndirilmiş iş rejimi davam etdirilir və hava şəraiti normallaşana qədər nəzarət tədbirləri intensiv şəkildə həyata keçiriləcəkdir.
102info.az
